चीन विश्वकै सबैभन्दा ठूलो निर्यातकर्ता भएको पुष्टि

चिनले गत बर्षको ११ महिनामा जर्मनी भन्दा बढी उत्पादनहरू निर्यात गरेको देखिएको छ
चीनमा प्रकाशित ब्यापारिक तथ्यांकहरूले चीन विश्वकै सबैभन्दा ठूलो निर्यातकर्ता भएको पुष्टि गरेको देखिएको छ।
गत हप्ता जर्मनीमा प्रकाशित तथ्यांकले उक्त अग्रणी युरोपेली निर्यातकर्ता देशलाई चीनले उछिनेको र गत बर्षको पहिलो ११ महिनामा अन्य कुनै देशभन्दा बढी आफ्ना उत्पादनहरू विदेश पठाएको देखाएको थियो।
अब डिसेम्बर महिनाकालागि चीनको आंकडाले चिनियां निर्यातले जर्मनीको कूल बार्षिक निर्यातलाई जित्ने संकेत दिएको छ।
तर आगामी महिना जर्मनीले आफ्नो पूर्ण बार्षिक तथ्यांक सार्वजनिक नगरुञ्जेल त्यसको पुष्टि हुने छैन।

गएको बर्ष चीनका निर्यातकर्ताहरूलाई सजीलो थिएन।

विश्वब्यापी मन्दीका कारण चीनको निर्यातजनक उत्पादनहरूको मागमा कटौती हुन गएको थियो।

सन् २००८ को अन्त्यदेखि हरेक महिना नै सरकारले अघिल्लो बर्षको दांजोमा आफ्नो निर्यात तथ्यांक कम भएको जनाईरहेको थियो।

तर सन् २००९ को अन्तिम केही हप्ताहरूमा त्यस्तो प्रवृत्ति ठिक उल्टो भैदियो।

पछिल्लो आंकडा अनुसार डिसेम्बर महिनाको निर्यात गत बर्षको तुलनामा झण्डै अठार प्रतिशत बढी रह्यो, जुन विश्लेषकहरूले गरेका अनुमान भन्दा पनि बढी हो।

चीनका धेरैजसो निर्यातकर्ताहरू कम मूल्यको बस्तु उत्पादन गर्नेहरू वा विदेशबाट भित्र्याइएका पुर्जाहरू पुन: जडान गर्ने कारखानाहरू हुन्।

पछिल्लो तथ्यांकले त्यस्ता कारोबारहरू विश्वव्यापी आर्थिक मन्दीको समयमा पनि सुदृढ रहेका देखाएको छ।

अहिले तिनका ग्राहकहरूले आआफ्नो मौज्दातलाई नवीकरण गर्न लाग्दा ती कम्पनीहरूले फाइदा लिइरहेका छन्।

सन् २००९ को उत्तरार्द्धमा त्यहां देखिएको बलियो आर्थिक बृद्धिले खनिज लवण र उर्जा जस्ता आयातीत सामग्री र उत्पादनको माग पनि बढाइदिएको छ, जसले गर्दा अन्य मुलुकसंग चीनको निर्यातको तुलनामा आयातमा हुने बृद्धिको मात्रा पनि कम हुन गएको छ।

अब चीनको त्यस्तो बलियो निर्यात तथ्यांक देखिएपछि उसका प्रतिस्पर्धीहरूले चिनियां मुद्राको भाउ निर्धारण कम गरिएको भन्ने गुनासोहरू पुन: गर्न थाल्नेछन्।

चिनीयां मुद्राको कम मूल्यांकनले अन्य प्रतिस्पर्धीहरू सामु चीनलाई राम्रो प्रदर्शन गर्न सघाउ पुग्दछ।

ती प्रतिस्पर्धीहरूका अनुसार अन्यत्रभन्दा चांडै र बलियोसंग माथि उक्लिएको चीन जस्तो अर्थतन्त्रले आफ्नो मुद्रालाई कमजोर बनाइराखेर आफ्नो सामानहरूको भाउ सस्तो पार्ने काम जायज होइन।

तर चीनका प्रधानमन्त्री वेन जीयाबाओले अन्य ठूला अर्थतन्त्रहरूले दिने त्यस सम्बन्धी दबाबका अगाडि आफू नझुक्ने बताएका छन्।

उनले भने, "चीनले डलर, युरो र येनको दांजोमा आफ्नो देशको मुद्राको भाउ बढाउनका लागि आइरहेको त्यस्तो दबाब स्वीकार्ने छैन।"

bbc nepali

  Email this News          Viewers Comment